[Negritaz eta azpimarraturik dagoena da garrantzitsuena. Bereziki letra beltzean agertzen diren siglak...]

Euskadiko Federazioak baieztatu du aurtengo gabonetan ere ez dela selekzioaren partidarik izango

Jokalariak eta biak ez dira ados jarri 'Euskadi' eta Euskal Herria' izenekin. "Zazpi herrialdeko nazioa ordezkatu" nahi dutelako gura dute jokalariek 'Euskal Herria'-rekin jokatzea. Iaz ere ez zen izan partidarik, arrazoi horregatik.

Berria.info   2009-11-26 - 17:34:54

Lehengo ostegunean iturri ez-ofizialetatik jakin zena baieztatu du gaur 15:00ak aldera Euskadiko Futbol Federazioak: aurten ere ez dela gabonetan senior gizonezkoen selekzioaren partidarik izango. Federazioa eta jokalariak ez dira ados jarri.

Euskadiko Futbol Federazioak ohar baten bitartez jakinarazi duenez, "Federazioko zuzendaritza berriaren lehentasuna izan da selekzio nagusiak jokatzen duen neurketa berreskuratzea".

Bi parteek asteak eman dituzte negoziatzen. Federazioak 'Euskal Selekzioa' izena proposatu zuen, baina eskaintzak ez du erabateko adostasuna izan jokalarien artean.

"Jokalari guztiek, ordea, ez zuten bat egin adostutakoarekin, eta Federazioak ez zuela ofizialtasunaren alde nahikoa egiten argudiatuz uko egin zioten partida jokatzeari", Euskadiko Futbol Federazioaren arabera.

Iaz federazioak Iranen aurkako partida antolatu zuen abenduaren 23rako, eta selekzioari 'Euskadi' izena jartzea erabaki, aurreko urtean San Mamesen Kataluniaren aurka jokatutako neurketan erabilitako 'Euskal Herria' izena baztertuta. Presiopean hartutako erabakia izan zen, ez Eusko Jaurlaritzak, ez EAJko zenbait ordezkarik, ezta zenbait babeslek ere ez baitzuten begi onez ikusten 'Euskal Herria' izenarekin jokatzea.


Federazioak hartutako erabakiak berehala izan zuen erantzuna: 165 futbolari eta futbolari ohik agiria kaleratu zuten, 'Euskadi' izena erabiltzearen aurka azaldu ziren, eta 'Euskal Herria' izenari eusteko eskatu zuten. "Euskal Herriko kirolariok ez gaude prest atzera egiteko. Iaz errealitate bihurtu genuen ametsa ez dugu berriz amets bihurtzen utziko. Kirolariok ez dugu atzera egingo", zioten agirian. 'Euskal Herria' izenarekin jokatu nahi zutela aldarrikatu zuten. "Zazpi herrialdeko eta 21.000 km koadroko nazioa ordezkatu nahi dugulako, eta horrek, gaur eta orain, 'Euskal Herria' duelako izena".

Jokalari eta jokalari ohiek sinatutako agiriak atxikimenduak jasotzen jarraitu zuen. Hala, Euskal Herriko 830 kirolarik "babes osoa" azaldu zioten. "Futbolarien arrazoi eta erabakiekin bat egin eta gure egiten dugu, eta Euskadiko Federazioari Euskal Herriko selekzioak nazioarteko txapelketa ofizialetan parte hartzeko bidean atzerapausorik ez emateko eskatzen diogu".

ESAITek deituta, milaka lagunek hartu baitzuen parte abenduaren 27an Bilbon egindako manifestazioan, eta euskal kirolariei "babes osoa" eman zieten, eta "argi utzi ofizialtasunaren bidean ez dagoela atzerapausoentzako tokirik".